Yamaha

Dongéng Nasruddin Hoja: Jadi Khotib Jumaah

  Senin, 03 Mei 2021   Redaksi Ayopurwakarta
Ilustrasi Nasruddin Hoja.

Poé Kemis, isuk-isuk Nasruddin Hoja geus sageud maké baju alus rék Jumaahan di masjid nu rada anggang ti imahna, di kampung sabelah. Nasrudin inditna, biasa, naék keledai kameumeutna, “Si Kedul”.

Ngahaja inditna poé Kemis kapan keledeina kedul pisan. Bororaah bisa lumpat, leumpang gé lalaunan kacida. Keteyep, ketyeep. Geus dikira-kira ku Nasruddin, bakal nepina ka kampung sabelah téh isukna, pas rék waktu Jumaah.

Di jalan, kungsi babaturan Nasruddin nanya, “Rék ka mana yeuh meni tos gaya?”

“Badé Jumaahan?”

“Naha Jumaahan? Pan kakara gé ieu poé Kemis.”

“Ih, pan keledei kuring mah apal sorangan, kedul pisan. Geus Alhamdulillah bisa nepi ka masjid sabelah pas Jumaah gé.”

***

Di masjid éta téh, Nasruddin kabagéan jadi khatib sakaligus imam Jumaah. Geus azan, Nasruddin naék mimbar.

Can lila manéhna khutbah, katingali para jamaahna geus narundutan. Ngalegeday. Malahan sabagian jamaahna saré bari kérék.

Ningali jamaahna sararé, Nasruddin ujug-ujug ngajorowok, “Seneu! Seuneu! Seuneu!”

Atuh, jamaah nu narundutan jeung nu saré téh harudang, ceungkat.  “Di mana aya seuneu? Di mana seuneu? Di mana aya kahuruan?”

Nasruddin tenang-tenang wé siga nu teu aya nanaon. Malahan Nasruddin neruskeun khotbahna, “Seuneu ayana di naraka, bakal ngaléntab ka sakur jalma-jalma nu laléi tina salat.”

  Tags Terkait

   Ayo Bagikan!
Ayo Respon
   Komentar

Komentar sepenuhnya menjadi tanggung jawab pribadi seperti diatur dalam UU ITE

Komentar