Yamaha

IDULFITRI

  Rabu, 12 Mei 2021   Dudung Ridwan
Ilustrasi salat Idulfitri. (ayobandung.com)

Poé nu ditunggu-tunggu ku nu paruasa. Ku nu henteu puasa ogé kétang—da biasana mah lauk buruk milu mijah.

Lalaki awéwé, bapa-bapa, ibu-ibu, para rumaja, barudak leutik, isuk-isuk ngaleut marawa sajadah. Rék salat sunat Id ka lapang bola.

Garinding. Bur bér, paalus-alus baju.

Di lapang geus rame. Tapi, panitia solat id ngoprék kénéh sound system. Bisi macét dina prakna, bahaya.  “Tés,  tés, satu, dua, tiga percobaan. Tés, tés!”

Beu, loba nu daragang geuning: tukang és krim;  tukang balon oé, oéan; tukang cocoan, tukang ciréng. Beu, naha nu daragang téh moal salat Id?

Barudak leutik mah atoh loba nu dagang. Kahayangna moal bisa dibébénjokeun. Tapi, teu nanaon, keur baroga duit.

Sora takbir kakara kadangu. Aa Ustaz jadi imam takbir. Alus sorana, ageum, “Allohu akbar. Allohu akbar. Allohu akbar. La Illaha Ilalahu Alloh akbar. Allohu akbar walillahilhamdu.”

Panitia muterkeun kotak amal alias kéncléng. Ih, ieu penting. Mangsana maréma keur dkm mah. Lumayan, jang minuhan kas masjid. Hésé ngahaja ngumpulkeun jalma kalawan keur laloba duit téh.

Bérés salat Id, sasalaman bari maca sholawat.

"Hayu balik, opor hayam kaburu tiis," ceuk pamajikan.

"Ké lanan. Jug, tiheula. Sugan wé panggih jeung ‘mantan’ kabogoh," témbal kuring na haté. Panon mah rada culang-cileung ka tempat awéwé.

Pamajikan terus ngaleungit. Duka ka mana? Kahalangan ku nu sasalaman.

Èlis nu dianti-anti katémbong. Dibaju bodas. Dijilbab biru. Dipapantes ku kongkorong emas. Mukena nyangsang dina taktakna.

Nyampeurkeun. Anggeur geulis. Imut ngagelenyu. Jajantung kuring ratug.

"Èh, Marwan, damang?” Èlis tihela nanya.

"Pangésto. Mana si Akang dokter teu katinggal?" kuring malik nanya.

"Teu apal kitu pun lanceuk tos ngantunkeun? Pan kéngéng ku Covid 19."

Jajantung asa eureun. "Duh, punten."

"Teu sawios."

Pamajikan ujug-ujug ngadorong kuring ti tukangeun. “Hayu, balik ulén bisi béakeun!”

Kuring kakara disadarkeun yén sasalad can réngsé--dokter waé bisa beunang ku si covid, komo urang-urang?

Tapi, kabéh poho kana masker. Poho kana jaga jarak. Poho kana protokol kaséhatan. Sabab, kébeh hayang ngarayakeun Idulfitri.

  Tags Terkait

   Ayo Bagikan!
Ayo Respon
   Komentar

Komentar sepenuhnya menjadi tanggung jawab pribadi seperti diatur dalam UU ITE

Komentar